لو كنت مكانى
كنت حتفعل أفعالى
فكر تانى و تانى
قبل ما تجاوب سؤالى
الإجابة مش سهلة
و لا تخطر من أول وهلة
على بالك و لا على بالى
*******
يعنى لو كنت حاكم
مش حيميل الميزان
لكفة أى ظالم
استعبد الانسان
و لو كان ابنك الغالى؟!
و ان ايدك مرة تطمع
فى أموال الخلايق
حتقول للقاضى اقطع
و تركع للِّى خالق
مهما عليت فى العلالى؟!
و حتسمح للَّى خالف
يبدُر فكرة معارضة
تطرح مليون مناكف
يقلع جدور السلطة
و ترجع انت خالى؟!
فكر قبل ما تجاوب سؤالى
*******
و لو اتولدت قبطى
فى بلاد المسلمين
حتكون بالوصف مرضى
ولاَّ بتلعن سنين
غيرت حالك و حالى؟!
حتعذر اللى كارهك
و حتغفر للَّى كفّر
و تخالف كل أهلك
و تقول لازم أغيّر
ايه يعنى رح يجرالى ؟!
حتعيش سعيد انت و أنا
و انت فى دنيا لواحدك
و ان مس حد أرضنا
تجرى و تفتح سِدرك
تاخد الرصاص بدالى؟!
فكر قبل ما تجاوب سؤالى
******
ولو كنت نائب للملك
و صحيت لقيته اتخلع
تهتف تقول أجدع ملك
و لاَّ يا بخت من بات خرع
و أهو الجديد يحلا يا خالى؟!
***
و لو كنت فى امتحان
و الكل فى بيغش
ترضى تكون خسران
والكل ناوى يقش
تقدر تفضل مثالى ؟!
***
و لو مسجون يا حر
فى شىء اسمه وطن
و كل يوم بيمر
تتباع من غير تمن
مش راح تبيع الغالى ؟!
***
فكر قبل ماتجاوب سؤالى
*******
